علاج الدواجن بالاعشاب معلومات مجمعة عن تجارب المربين - القيصر نيوز
الرئيسية / أهم الأخبار / علاج الدواجن بالاعشاب معلومات مجمعة عن تجارب المربين
علاج الدواجن بالاعشاب معلومات مجمعة عن تجارب المربين

علاج الدواجن بالاعشاب معلومات مجمعة عن تجارب المربين

تجميعة لغالبية علاج الدواجن بالاعشاب المجربة والتى حققت نتايج حقلية جيدة جدا نظرا لغلاء الادوية وحرصنا على انتاج دجاج ذات طعم جيد وتحسين صورة الدجاج عند المستهلك فهنحاول نخفف جدا من شغل الادوية ونزيد من شغل الاعشاب حتى لو بنسبة 30% ادوية للظروف الطارئة والملحة و70%اعشاب لو اى خلطة من دى انقذتك من مرض او خففت عنك مشكلة ادعى لصحاب الخلطات

 

موضوع مجمع من الدكتور عاطف عبد الدايم

ملحوظة هامة
علشان تاخد النتيجة اللى احنا اخذناها من الاعشاب لازم مش يكون مغشوش وتتقيد بالتعليمات اللى موجودة فى البوستات سواء علف او مية اة جرعات  لكم فى ذمتى شوية معلومات جديدة لم تنشر بعد بس لما احس ان الناس مهتمة وتتفاعل مع المقال في التعليقات
نبدا على بكرة الله
لعشاق الطب البديل او شغل الاعشاب ونظرا لدخولنا الى دوات الشتا قريبا اليكم التركيبة دى 250 جم اوراق ريحان 250 جم اوراق نعناع 100 جم خزامى او يسمى لانفندر او يسمى خزم على حسب كل بلد الكميات دى هنغليها على 2 لتر ماء لمدة 10 دقايق والافضل اننا نضيف المية السخنة ليها وليس العكس لاننا عاوزين نطلع المواد الفعالة من غير ضرر ودى انسب طريقة بعد ما تضيف الخلطة السابقة الى 2 لتر ماء مغلى وتغطية 10 دقايق علشان يطلع كل المواد اللى احنا عاوزينها ضيف على الخليط 1 ك عسل اسود او عسل دبس او عسل تمر المسمى على حسب كل بلد وضيفهم على 500 لتر ماء، فوائد التركيبة توسيع الشعب الهوائية نزيل بلغم مخفف من الامراض التنفسية فاتحة للشهية تقلل النافق بسبب الامراض التنفسية هتاخر جدا من ظهور الطشمة ومش هتحتاج ادوية كتير علشان تعالجها .

نقلا عن الدكتور عاطف عبد الدايم

شاهد الأمراض التي تتسبب في الاسهال عند الدجاج وعلاجها

فى وسط الدنيا اللى مليانة فيروسات دى هنتذكر دور الاعشاب فى تجنب اضرار الفيروسات ومن خلال بعض التجارب الحقلية السابقة مع بعض الاعشاب وفوايدها وبعض الاعشاب الاخرى اللى لم تجرب على علاج الدواجن لاكن جربت على الانسان والحيونات الكبيرة وفى ظل وجود قانون مشهور جدا وكل خبراء الاعشاب فى العالم عارفينة القانون بيقول اى عشب بيسخن الدم بيوقف نشاط الفيروسات التنفسية وبيقلل من شراسة الفيروسات الاخرى ( وليس قاتل ) الى ان يتعافى الجسم ويقوم هو بالتغلب على الفيرس .

 

وفى ظل ماسبق هنعمل الخلطة دى للمناطق المنتشر فيها الانفلونزا بنوعيها سواء h9 او h5 وفى ظل وجود الاى بى بكل انواعة الخلطة على عنبر 5 الاف طير هنبدا من عمر 12 يوم يعنى قبل ما يتاثر الجهاز التنفسى او تظهر الطشمة وهنعمل الاتى 100 كيلو علف مضاف اليها 2ك ثوم مفروم 1.25 ك زنجبيل 400 جم كينا ( على هيئة لحاء او قشور ) او الكافور كل واحد فيهم يتخلط ويكون على شكل بودرة ويخلط خلط تام على ال100 كيلو علف وهتقدم وجبة فى الصباح على ان يكون قبلها 2 ساعة اظلام يعنى مثلا اطفى النور الساعة 4 ليلا واعلف الساعة 6 الصباح ونفس الموضوع هتعملة فى المساء بنفس الكمية هتطفى النور المغرب الساعة 5 وهتعلف على الساعة 7 مساء .

نقلا عن الدكتور عاطف عبد الدايم

 

طريقة خلط الاعشاب
هتفرد اول 50 ك علف على كيس وهترش علية نص الخلطة السابقة وتفرد ال50 ك الباقيين وتفرد علية النصف التانى من التركيبة وهقلبهم بطريقة متجانسة ووانت بتقلب هتكون مجهز محلول عسل اسود يعنى بخاخة فيها 2 لتر مية مضاف ليها 1 ك عسل اسود واخد هيخلط العلف علشان يعمل تجانس فى التركيبة مع العلف وواحد يرش محلول العسل بشرط عدم ترطيبة بل تندية فقط بعد عمر ال25 يوم الخلطة هتكون على 150 كيلو علف او 3 اكياس وعليها هيكون كل عشب مرة ونص يعنى الثوم من 2 ك الى 3 كيلو والكينا هيكون 600 جرام يعنى ضيف نص الكمية.

 

ملحوظة هامة لكثر عملية الغش فى الاعشاب خاصة الكينا والزعتر افرك العشب على ايدك لازم تشم رائحة عطرية نفاذة مميزة اما الزنجبيل معروف بانة حراق دا شغل العلف وعند ظهور اول الاصوات التنفسية هنقوم برش زيت الكافور مع زيت نعناع اعلى الطيور بارتفاع متر بمعدل نص لتر زيت كافور مع ربع لتر زيت نعناع لو معرفتش ترشهم لانهم زيت ضيفهم على بخاخة فيها 4 لتر كيروسين او بروبيولين جليكول او مسحوق صابونى المهم اى مادة تسهل زوبان الزيت تتناسب معاك بس خلى بالك اطفى الدفايات بعد الرش وقبلة باقل حاجة 1.5 ساعة الرشة دى مرتين مرة صباحا ومرة مساء جربها وبامر الله هتكون وقاية وعلاج للاى بى والانفلونزا وهتريح الجهاز التنفسى واعتقد انك مش هتحقن للطشمة لو استعملت بطريقة جيدة الشغل لازم فى العلف هتقولى العلف جاهز هقلك اخلط علية عادى اما شغل المية فصعب ان الطير يكون عرضة للعشب بصفة يومية لان فية علاجات وتحصينات مما يقلل من كفاءة التركيبة اللهم اجعل عملنا هذا خالص لوجهك الكريم .

 

تكملة لسلسة استعمال الاعشاب فى مجال علاج الدواجن البوست خاص بالناس اللى بتركب علف مش للى بتشترية جاهز حط 3 ك زعتر مع 2 ك قرفة على الطن من عمر اسبوع الى قبل البيع ب 5 ايام وشوف المعوى شكلة اية طول الدورة شوف التحويل عمل معاك اية شوف الاصوات التنفسية عاملة اية مقارنة بقبل كدا شوف الدورة دى هتصرف كم دوا بالمقارنة بمصاريفك كل مرة .

نقلا عن الدكتور عاطف عبد الدايم

 

 

تكملة للمنشوات اللى بنتكلم فيها عن دخول الاعشاب فى مجال علاج الدواجن لتحتل تدريجيا الادوية الكيماوية تجربة حقلية اتعملت وكان لها متابعة معملية
كنا بنضيف نص كيلو ينسون لكل كيسين علف او 100 ك ومعاة 1 ك روز مارى او ما يسمى فى مصر اكليل الجبل (عشب رخيص جدا موجود عند العطار )

 

وكان فية دكتور فى مركز البحوث بتاعة البلد اللى شغالين فيها كان بياخد من المزرعة عينات بصفة مستمرة واصيب القطيع ب E.coli ولما نزلنا الخلطة دى فى العلف على فراخ فى الحجازة او اللى فيها الكولاى وبعد فترة من الخلطة لاحظ الدكتور انخفاض غير متوقع من الميكروب فى كل من الحوصلة والامعاء بعد الخلطة ب 5 ايام من نزولها وبالتكملة الى الى اخر الدورة كان لم يلاحظ على الطير حقليا اى كولاى كان شبة معدوم ومعمليا بشهادة الدكتور كان اقل من الطبيعى الخلطة لها اكثر من فايدة لاكن احنا بس بتسلط الضؤء على النتيجة المعملية فقط .

 

شوفو يا جماعة الامراض كتير خاصة الفيروسية اللى مفيش حد بيقول انة قادر عليها طيب تعالو نشوف كلام النبى وندخل فية بعض العلم علشان نبرمجة على ظروفها الرسول بيقول عليكم بأربع، فإن فيهن شفاء من كل داء الا السام( الموت) ، السنا والسنوت والثفاء والحبة السوداء طيب طالما الرسول قال ان دول علاج لاى داء بما فيهم الفيروسات وخبير الاعشاب المصرى الدكتور عبد الباسط السيد عمل دوا كبرائة اختراع لفيرس سى من السنا والسنوت (عصارة النبات ) بنسبة 1: 1 فتعالى ناخد كل المعطيات دى ونعمل منها توليفة تنقذنا من اللى احنا فية .

نقلا عن الدكتور عاطف عبد الدايم

 

اولا الاعشاب دى بالمصرى معاناها اية السنا ( الشبت ) وبعض الناس بتقول انة السناميكى لو طلع السناميكى ف الموضوع كلة فشل فى التسمين لانة بيعمل اسهال السنوت (الشمر ) الثفاء (حب الرشاد ) الحبة السودا ( حبة البركة ) بما انة كل واحد يمنع كل الامراض فما بالك باجتماعهم مع بعض كمان كل خبراء الاعشاب بيقولو افضل نتائج نسبة متجانسة من السنا والسنوت حبة البركة معروف انها ضعف اى عشب لما تتخلط فى اى تركيبة حب الرشاد بيكون من نصف الى ربع اى عشب فى اى تركيبة نظرت لقوة المواد اللى فية دا اسس فى علم الاعشاب بكدا ممكن نترجم الكلام اللى فات دا ونعمل تركيبة متوازنة من وانا واثق ثقة تامة انها علاج اى مرض مهما كان طالما المسبب بيكتيريا او فيرس او فطر او بروتوزوا يعنى تقريبا كل امراض الدواجن باقى فقط ان الكلام دا يترجم على ارض الواقع انا لو عندة مزرعة شغالة كنت عزلت كمية على جنب وجربت فيهم الى الوصول لافضل نتايج لاكن مفيش مزراع الان متاحة وطالما الدكتور عبد الباسط نجح فى علاج الدواجن فيرس سى لما اخد حديث نبوى وكان عندة يقين فية ونجح فممكن جدا احنا ننحج فى انتشال المجال من الفيروسات العاصفة بية دى بعض الخواطر بس بصوت عالى ولو لقيت اى فرصىة هطبقها ونكتب النتاج على الجروب.

 

موقف حصلى حصل وطلعنا منة بمعلومة قد تفيد ناس كتير كل الناس اللى متابعة معانا من فترة اننا ادخلنا الاعشاب فى اكثر من مرض وكانت نتايجها مبشرة وبردة الكل عارف اننا نصحنا فى اثناء الاحتباس الحرارى بمنقوع العرق سوس وكتير جدا اتصلو بيا يشكرو فى الوصفة دى وازاى انها بتعمل تخفيف واقلال من العبئ الحرارى اثناء الحر وفى احدى المزارع كان فية عمر صغير الاسبوع الاول من العمر وعمر 32 يوم ومن متابعة الارصاد علمنا ان فية موجة حارة هتحصل فقلنا الكتاكيت مفيش خوف عليها وخلينا نشتغل على العمر الكبير وحطينا منقوع عرق سوس فى المية طوال مدة الموجة الحارة اللى استمرت 5 ايام وزودنا الجرعة شوية على اساس تاثير افضل فبدل ما تعمل 2 كيلو على 2 لتر مية حطينا 4 كيلو على 2 لتر مية ( ماء فاتر او حرارة مقبولة مش مغلى )

نقلا عن الدكتور عاطف عبد الدايم

وحصل الاتى كان فية علف جديد فية سموم فطرية ( بالتشريح وجد انها افلاتوكسين ) وعمل نافق فى الكتاكيت العنبر الصغير كان 15 الف طير وكان بيطلع نافق 250 بسبب السموم بعد العلف مباشرا ب24 ساعة والعنبر التانى كان 12 الف وواكل نفس العلف لانى كنت بعلف بادى طول الدورة ولوحظ قليل من المية حول القلب (هيدروبريكارديم ) واحتقان فى القلب والكبد واسهالات مختلطة وبعض التجلطات الدموية فى التجويف البطنى وعلى الكبد واعراض الافلاتوكسين المعروفة لوحظ ان حصل اعراض سموم فقط بدون نافق مرضى ( كان طبيعى ) طلعنا من التجربة دى بان زيارة جرعة العرق سموم تشتغل كمضاد سموم وبيبان نتايجها بعد ما تتحط فى المية ب2 الى 3 ايام واخذنها كملعومة وبدنا نحط نحط المنقوع كل اسبوع سقوتين ليلا (طول الليل ) وكنا نلاحظ ان الكبد كويس والاسهالات قلت والعرج بتاع السموم غير ملحوظ بعد اكثر من موقف مع العرق سموم اخذناها معلومة او خبرة حقلية ان زيادة جرعتة تعمل كمضاد سموم لو السموم عالية هتظهر اعراض ونافق خفيف اتمنى ان يكون الموقف الحقلى افاد الناس
نصيحة للمربى اللى شغال فى مزرعتة اعزل 100 الى 200 طير على جنب واعمل تجارب عليهم باى حاجة متاحة لك واعمل خبرة حقلية شخصية تكون خاصة بيك ثق تمام الثقة ان اسرار النباتات لا تحصى ولا تعد وخاصة اسرار الاعشاب ودايما خليك مؤمن ايمان تام بحديث الرسول دا وعن أبي سعيد الخدري أن رسول الله صلى الله عليه وسلم قال: ” ما خلق الله من داء إلا وجعل له شفاء علمه من علمه وجهله من جهله إلا السام والسام الموت “.رواه ابن ماجه. يعنى معنى كدا ان فية علاج لاى حاجة حتى الفيروسات لاننا لازم نصدق البنى اى اى حد تانى مهما كان الحد دا مش عارف تبدا ازاى
هقولك طلع احاديث النبى عن الاعشاب وجرب كل عشب فى تجربة وستجد العجب العجاب من الطريف فى موضوع الاعشاب دا جربت حاجات كتير تقريبا اكثر من 63 عشب ووصفة لدرجة ان كنت جنب حقل برسيم وقلت اجربة البرسيم على وتاثيرة على الفراخ
واخذت معلومة حقلية ان اكثر حاجة تزيد صفار البيض فى اللون وتعمل طعم جيد جدا وتعمل بيض يقبل علية المستهلك ويخليك تنافس هو البرسيم الاخضر دا وجربت السريس (اكيد كل اللى فى الارياف عارفينة) او ما يسمى الشيكوريا دا عشب او بنات بيتطفل على البرسيم ولما لقيت ان السريس اللى بيعجز طعمة فية مرارة شوية فقلت ممكن يكون لة فوايد فى علاج الدواجن فقطعتة وعملتة للفراخ ووجدت المعوى ممتاز طول الدورة والنافق الطبيعى اقل من كل دورة المقصد من السرد دا ان اى حاجة حولك جربها بس بحذر لو مش واثق ابدا من حيث انتهى الاخرون لو مش عندك الجراءة ابدا من احاديث النبى المهم ابدا وصدقنى هتنسى كلمة الادوية المستمرة وهتلاقيك داخل فى اتجاة تانى خالص هيحببك فى المجال انا بقول الكلام دا لانى احبكم فى الله وعاوز الناس تستفيد وتقلل من الشغل الكيماوى حتى لو تخلى النية ناكل الناس حاجة نظيفة
موقف احب اسردة هنا حالنا مستشار علمى لشركة كورية علشان يقنعنا بمنتج غريب جدا بيقول بيتحدى بية وانة مجرب عن فلان رجل الاعمال المشهور فى مزارعة تخيل المنتج دا عبارة عن فرشة للفراخ فرشة يا مؤمن فرشة تخيل كوريين جايين لغاية السعودية علشان يروج لفرشة فراخ
بس مش اى فرشة بيقول انها مش بيطلع منها ريحة خالص بيقول هيقل جدا معاك المشاكل التنفسية بيقول هتعمل تحويل افضل بكتير من اللى متعود علية كل دا جميل احد العملاء عندى قالى تعالى شوف المنتج دا علشان اتعامل معاهم ولا اطنشهم تخيل لقيتة اية لاقيتة الغلاف الخارجى لحبة الارز
يعنى الرجيع بعد ما بناخد الارز بيكون فية غلاف هو دا وبسعر كويس جدا كمان طيب فضلت متعجب الموضوع لغاية لما قلتلهم اشوف التجربة على ارض الواقع رحنا لمشروع مجرب الفرشة دا فعلا المهندس المشرف قال ان مفيش ريحة خالص طوال الدورة والطشمة بتيجى متاخرة جدا على غير العادة
والتحويل افضل من كل مرة قلت للراجل اللى طالب مشورتى اتوكل على الله واتعامل معاهم وحبيت اشوف طبيعة المنتج دا اية تخيل .
لاقيتة رجيع الارز بس معالج بخليط من كلوريد الالومونيوم مع كربونات الكالسيوم بنسب معينة ((مرضاش يبلغنى بيها)) مع العلم اننا كاتبين بوستات كتيرة جدا عن اضافة المنتجين دول للفرشة للتخلص من الامونيا للناس اللى ملهاش فى الاسماء الكيميائية دول خالطين جير مع شبة على الفرشة وجايين يبيعوها لنا طبعا هم بينصحو اننا نعمل طبقة نشارة عادية ونحط فرشتهم فوقها بشكل معين ولة طريقة شغل وارشادات من عندهم بس سيبك من دا كلة انا بس بوضح ان فكرة بننادى بيها من فترة الكورين حولوها لفرشة تباع وتصدر للدول وانت يا حضرة المربى مش عاوز تشتغل بالطريقة اللى بننصحك بيها .

نقلا عن الدكتور عاطف عبد الدايم

ملحوظة نفس الشركة عندها منتج لمنع الاحتباس الحرارى وزعلت جدا لما عرفت ان تركيبتة عرق سوس لان يشهد الله انى اول من جرب تاثير العرق سوس على الاحتباس الحرارى وان الفكرة جاتنى من تاثيرة على الصيام لما بنشربة قبل السحور فى ايام الصيام الحارة دا اللى خلانى اجربة على الفراخ المهم ان بعد فترة هتلاقى الكوريين والصيين واخدين كل الاعشاب اللى بنشتغل بيها او بننصح بيها دى ويعملوها على هيئة مستخلصات وبيعوا لنا هنا جرب الشغل اللى بننصح بية لا تتكاسل سيبك من الشغل التقليدى او الكيماوى اللى بهدل الناس دا بسرد القصة دى علشان نبين ان كل العالم من حولنا شغال بطريقة مختلفة ولا يعانى ما نعانية نحن .
طريقة مبسطة لاضافة الخلطات العشبية اللى بنكتبها على العلف المحبب او الجاهز هتجيب كل عنصر من الخلطة يعنى مثلا خلطة الكركم والثوم المقترح ان 4 الى 5 ك كركم مع مثلهم من الثوم دا على الطن لاكن فى حالة الخلط اليدوى اخلطهم على عدد 2 كيس علف يعنى 100 كيلو يعنى نص كيلو كركم مع نص كيلو ثوم على ال100 كيلو علف هتجيب نص كيلو الكركم وتضيفة الى 2 كيلو علف فى اى طبق واسمع ويكون طريقة الخلط جيدة جدا ومتجانسة ونفس الطريقة للثوم بعد خلطة بالخلاط او فرمة وبكدا هيكون عندم 5 كيلو علف مع اعشاب هتقسم ال100 كيلو علف على 3 اجزاء وهتقسم ال5 ك بتوع الخلطة على 3 اجزاء ايضا وتجيب فرطة او مفرش او ستارة على الارض وتفرد عليها الثلث الاول من العلف بحيث يكون ارتفاعة من الارض حوالى من 5 الى 7 سم وتوزع علية من فوق او تنشر علية ثلث الخلطة تنشرة بحيث يتنشر على سطح العلف كلة ثم نفرد فوقهم الثلث الثانى من العلف بنفس كيفية الثلث الاول ونفرد فوقهم الثلث التانى من الخلطة ونفس الكلام فى الثلث الثالث من العلف والثلث الاحير من الخلطة وبكدا يكون عندك 3 طبقات من العلف بينهم 3 طبقات من الخلطة .

نقلا عن الدكتور عاطف عبد الدايم

 

وتعالى للخلط اليدوى بايدك افضل وتخلط من عند جواف العلف من اعلى الى اسفل بحركة دائرية بس اللى يتخلط هاتة عليك شوية للخلف علشان تعرف اللى اتخلط من الباقى وهكذا الى ان يتم الخلط لكل التركيبة بالطريقة دى بيكون الخلط متجانس ميزة الخلط والعشب طازة حاجات كتير منها المواد الفعالة بتكون اعلى كفاءة منها الاعشاب السائلة او اللى فيها مادة عصيرية زى الثوم او البصل او الليمون ممكن خلطة مع العلف المحبب وهو طازة علشان بيمسك فى العلف المحبب حاول لا تخلط الخلطة وتبيتها او تركنها فترة لان بعض الخلطات بتعمل تكتلات فى العلف حاول عدم تعرض الخلطة للحرارة العالية علشان لا تقل من كفاءة التركيبة فية حركة جميلة علشان تقشر الثوم لو القشرة بتضايق وانت بتخلط الا وهى هات كمية فصوص الثوم اللى هتخلطها يعنى بعد ما تفكها من الراس الثوم نفسها وتصبح على هيئة فصوص وتحطها فى علبة مناسبة مع الكمية وافقل العلبة بغطاها وهز او رج العلبة بحركات سريعة متتالية لمدة لا تقل عن 60 الى 120 ثانية وافتح العلبة هتلاقى الثوم انفصل عن القشرة .

 

 

 

اغرب معلومة ممكن تسمعها وطبعا هى مش من تاليفى لا هى ان المحلول الكحولى من الكسبرة والكمون بيكون اقوى على الكولاى والاستاف من الجنتاميسين والسلفا والنادليكسيد اسيد والامبسلين دا بحث عملتة شركة اوربية شغالة فى استخلاص المواد الفعالة النباتية وتاثيرها على الحيوان
يعنى زرعو الميكروب فى الطبق واستنبتوة على البيئة بتاعتة وحطة المستخلصات دى وقارنو بين الزوووون بتاع الدوا وبين الزوون بتاع الاعشاب لاقو ان الاعشاب اوسع من الادوية بس خلى بالك ان دا محلول يعنى عصارة او خلاصة العشب لاكن احنا علشان ناخد نفس الفايدة وافضل منها كمان بنحط العشب كلة يعنى نضيف 2 كيلو كمون مع 3 كيلو كسبرة على طن علف طوال الدورة وبامر الله مش هتشوف الكولاى دا كمان وضع العشب كلة بيفيدنا فى باقى مكوناتة المهمة اللى لها تاثير على الوزن والتحويل والقناة الهضمية .

نقلا عن الدكتور عاطف عبد الدايم

 

 

 

علاج الدواجن تجربة فريدة من نوعها من المعروف ان القناة الهضمية هى المصنع المسؤل عن التحويل الغذائى وفيها الهضم والامتصاص ومعروف ان طول ما احنا محافظين على الطبقة اللى بيحصل فييها الهضم والامتصاص واللى مليانة غدد مناعية فدا معناة تحويل عالى ومناعة معوية فعالة طيب تعالى نشوف التجربة دى تجربة اتعملت على مجموعة معزولة من الكوب اتقسمت الى 5 اقسام القسم الاول اكل عليقة عادية بروتينها 20.03% بروتين وطاقة 3003.09 ك كالورى (التركيبة موجودة لو حد عاوزها) القسم التانى اكل نفس العليقة مضاف ليها ذنك باستراسين كمنشط نمو بجرعة 150جم مادة فعالة على الطن القسم الثالث اكل نفس العلف بس مضاف علية 5 كيلو كركم القسم الرابع اكل نفس العليقة مضاف ليها 8 ك مسحوق ثوم او ثوم مطحون على الطن القسم الخامس اكل مخلوط من الكركم ومسحوق الثوم بمعدل 9 ك بالتساوى بينهم النتايج كانت فعلا ممتازة مشفتهاش حتى مع الشغل الحديث بتاع البروبيوتيك وخلافة .

نقلا عن الدكتور عاطف عبد الدايم

 

المهم كان ارتفاع الخملات villi فى القسم الاول اللى اكل علف بدون اضافات 1005 ميكرومتر والقسم التانى بتاع الزنك كان 1300 ميكرومتر
القسم الثالث بتاع الكركم 1340 القسم الرابع بتاع الثوم 1210 فى حين ان القسم الخامس الخليط بين الكركم والثوم كان اعلى ارتفاع للخملات 1726 م متر دا عادى لاكن مساحة سطح الخملة نفسة كان ملحوظ جدا انة زايد يعنى هضم وامتصاص ومناعة عالية جدا فكان فى العليقة العادية 1400 ميكرو متر مربع ومع الزنك كان 3335 ميكرومتر مربع ومع الكركم 3500 م م مربع ومع الثوم 3150 م م مربع ومع خليط الكوركم والثوم كان 5060 م م مربع يعنى اعلى مساحة سطح ممكن تتخيلها .
ونفس الطريقة بالنسبة لمعدل عمق الخملة وكان معدل التحويل كالاتى العليقة العادية عملت تحويل 1,7 والعليقة بزنك عملت 1,55 والعليقة بكركم 1,55 والعليقة بثوم 1,6 والعليقة بالمخلوط 1,5 وخلى بالك ان البروتين اصلا بتاع العليقة منخفض عن الطبيعى يعنى المفروض اننا بنبدا ببادى 23% بروتين فى حين انة هنا بدا بعليقة 20% بس بناء امعاد وجدارها كان لة اثر عالى جدا طبعا مناعة معوية حدث ولا حرج مش محتاجة كلام امراض المعوية ( كوكسيديا وكولستريديا ) لما كانت بتيجى كانت ساعات برتوح لوحدها وساعات بتختفى من اول جرعة اسهالات بنية شبة معدومة خلاصة التجربة ان اصافة خليط الكركم مع مسحوق الثوم عمل نتايج هايلة جدا على كل المستويات اتمنى تكون التجربة مفيدة للاعضاء .

نقلا عن الدكتور عاطف عبد الدايم

 

 

فى احد التجارب عن تاثير الثوم كاضافات علفية عند الاصابة بالنيوكاسل قامت احدى المعامل التابعة لاحدى الشركات الكبرى فتجربة اضافة الثوم بمعدل 1 ك على 2 كيس علف ( 100 ك علف ) من اول يوم فى الدورة وكانت التجربة كالاتى عنبر رقم 1 اخد الثوم عنبر رقم 2 اخذ الثوم وعملو اصابة بالنيوكاسل بالعترة الضارية بجرعة 0.1 مل على عمر 14 يوم وعنبر رقم 3 اصابوها بالنيوكاسل على عمر 14 يوم ولم تعطى ثوم وعنبر 4 لم يعطى ثوم ولا يصاب النيوكاسل كانت النتايج بعد 72 ساعة من العدوى حالات نافق على والتواء بالرقبة واسهالات خضرا وشلل فى الارجل والاجنحة وكانت الاعراض والمنافق عنيف جدا فى عنبر رقم 3 فى حين ان الاعراض كانت خفيفة فى عنبر 2 وكمان النافق كان اخف طبعا عنبر رقم 1 و4 مفيش اى اعراض حتى انزفة المعدة الغدية كانت كتيرة جدا فى عنبر 3 .
وكانت عبارة عن نزف خفيف يكاد يتعد على الغدد يعنى ممكن تعد كم حبة نزيف على كم غدة فى عنبر رقم 2 ولوحظ كمان من التحليل انخفاض الPH ودا خفف جدا من محتوى الامعاء من الكولاى جدا واهم ملاحظة هى رفع المناعة من خلال قياس الجلوبيولينات المناعية طبعا لان الثوم مضاد اكسدة واى مضاد اكسدة رافع مناعة علشان كدا الشركة جاب المواد الفعالة فى الثوم واهمهم الاليسين و الداى اليل داى سلفايد (DADS) وعملو منة مستخلص وبدا يشتغلو بية كبرنامج اساسى فى اى دورة التجربة دى تبين دور الثوم الخرافى فى قلة حدة الفيروسات ورفع المناعة وتقلة الكولاى وباقى المسببات المرضية فى الامعاء من الاخر كدا الثوم ثروة قومية .

نقلا عن الدكتور عاطف عبد الدايم

 

 

 

علاج الدواجن بالثوم
على راى المهندس عاطف عبد الدايم ( اتعجب لمن عرف الثوم ومازال يستعمل المضادات الحيوية ومنشطات النمو) انت عارف لية كل واحد جرب الثوم فى تركيبتة العلفية عرف ان عندة هدية من البارى عز وجل لان كل التجارب الحقلية اللى استعمل فيها الثوم اثبتت نجاح باهر تعالى نجمع نتايج كل التجارب بتاعة الثوم بعنى مثلا لما حبو يستعملوة بمعدل 5 كيلو على الطن علشان يحسن الوزن فعلا رفع الوزن بمعدل 5 الى 6% اعلى من الطبيعى
يعنى زود الوزن حوالى 105 جرام لما كان المتوسط 2 كيلو يعنى تسبب فى زيادة قدرها 1 طن لحم فى قطيع 10 الاف طير يعنى بالسعر المنيل دا زود دخل المزرعة 10 الاف جنية مخصوم منهم ثمن 170 كيلو ثوم هل كدا بس لا دا رفع التحويل 7.5% عن كل مرة يعنى فى نفس العنبر اللى فات 10 الاف طير وفر علف 927 كيلو عن كل مرة يعنى شوف سعرهم كام دول فية كمان .
اة فية لسة زود المسطح الداخلى للبيرسا بمعدل 8.5% زود مساحة سطح الغدة الثيموسية بمعدل 7.7% يعنى زيادة فى مناعة الطير ومقاومتة عرفت لية الثوم العشب الوحيد اللى عمرة ما هيحرجك فى اى دورة بس متسمعش كلام حد يقولك الثوم المجفف او الثوم البيطرى لية؟ لان تعرض الثوم للجفاف او الحرارة او اى عمليات اخرى بيقلل من مادة الاليسين اللى هو بتعمل كل الشغل الى فات دا كمان بتقلل محتواة من الاملاح والفيتمينات الهامة يعنى لو سمعت كلام الناس دى مش عتاخد نفس الارقام اللى قلتهالك دى لا هتاخد ارقام اقل شوية بس استحلفك بالله ما تقولى انا باكل علف جاهز فازاى هخلطة على العلف بعد ما عرفت كل الفوايد دى ، للمرة الاخيرة وانا عارف ان الناس بتزعل لما نكرر المعلومة كتير لاكن معلش اخر مرة مفيش حاجة اسمها علف فية سموم او اصابة كلية او كبد بالسموم والعلف محتوى على زعتر وكركم فعلا جربتها كتير مهما كان مستوى السموم جربها بنفسك وادعيلى .

نقلا عن الدكتور عاطف عبد الدايم

 

اقتراح يا جماعة وبامر الله هيكون خير الخلطة دى على طن علف بس علف تصنيع مش محبب علشان كفاءة الخلط 3ك كركم 4 ك ثوم 4 ك نعناع ناشف
3 ك زعتر من اول يوم فى الدورة الى اخرها الاستقابل فى المية هيكون على سقوة عسل اسود بمعدل 5 جرام على اللتر و7 جرام خميرة على اللتر سوقة اخرى الكلام دا اول اسبوع كامل التحصينات فقط نيوكاسل ميت عمر يوم ورش كولون عمر يوم وعمر 11 يوم جمبورو عترة متوسطة وعلى 17 يوم تقطير كولون فقط بدون اى ادوية ولا تحصينات اخرى لو ظهر كوكسيديا حط جرعة فى اخر العشرينات وام لك تظهر خير وتقريبا مش هتظهر جربها ووحتى لو فى 1000 طير وبعدها ثق انك مش هتشتغل بادوية تانىودا تانى بوست عن تحسين الطعم للطير .

 

 

 

بناء على طلب كتير من الاعضاء هنعمل برنامج غير كيماوى لدورة تسمين كل الخلطات مجربة لاكن لم يجرب البرنامج بالطريقة دى يعنى كل الخلطات ناجحة لاكن لم اجمعهم قبل كدا فى برنامج واحد الاستقبال اول 12 ساعة على عسل اسود بمعدل 5 جم على اللتر مع محلول معالجة الجفاف خاصة لو الكتكوت جاى من مكان بعيد رش كولون 30 على الاقفاص اول يوم مع حقن انفلونزا ثنائى ( h5 +h9) بتاع لوهمان او اى شركة عالاة ثنائى طبعا مع النيوكاسل ميت تحت جلد الرقبة من عمر يوم الى عمر 5 ايام خميرة مع منقوع شعير متواصل عمر 7 ايام جمبورو عترة متوسطة عمر 9 ايام تكرر جرعة الاستقبال ( خميرة ومنقوع شغير ) 12 ساعة وال 12 ساعة الاخرى منقوع شبت وبقدونس وكرفس الى عمر 13 يوم
عمر 15 يوم تحصين جمبورو عترة فوق المتوسطة مع كولون 30 يفضل رش او تقطير 17 و 18 يوم باى كوكس 2 مل على اللتر 20و 21 و 22 و 23 هنخط خلطة ال نعناع + زعتر + خزامى +يوكاليبتوس (كافور) دى هتكون فى انهار اما فى الليل هنحط برومكسيم بشرى مع ايبكوفيللين بشرى بمعدل 1.5 مل على اللتر لكل منهما 25 يوم هنرش كولون 30 من عمر 27 الى 31 هنكرر اللى حصل يوم 20 33 و 34 يوم باى كوكس 2 مل على اللتر
35 و 36 تكرر جرعة الاستقبال الى اخر الدورة وعلشان الوزن مخلوط الحلبة والبصل والترمس الى عمر البيع نرجو التجربة عن جزء بسيط ثم عمم التجربة بعد النجاح بامر الله ** ملحوظة اخيرة كل وصفة من اللى فى البوست معمول بيها بوست خاص قبل كدا علشان مفيش حد يقول هنحطها ازاى والجرعة اية لان لو كتبناها بالتفصيل هتاخد منى 3 ساعات كتابة .

نقلا عن الدكتور عاطف عبد الدايم

 

 

فية حد عندة استعداد يخاطر ويجرب حاجات مشتغلش بيها قبل كدا او طريقة جديدة خاصة الناس اللى بيربوا فى منطقة موبؤءة اى بى وانفلونزا طيب الوصفة دى تحت التجربة لسة ولم تكمتل بعد لاكن حبينا نجرب مع بعض معلقة اكل من النعناع + معلقة من المرمية + معلقة من اليوكاليبتوس + معلقة خزامى + معلقة زعتر هنجيب لتر ماء ساخن بعد الغليان وننقع الكميات دى فية بعد طحنها طبعا ونسيبها 15 ق ونصفى المنقوع ونجيب المستحضر دا ونضيفة على 200 لتر مية لمدة 10 ايام متواصل ونريح اسبوع ونضيفة 10 ايام اخرى وهكذا ملحوظة هامة اوعى تحط الكميات دى وتغليها مع المية لانها هتطلع مواد فعالة تانية احنا مش عاوزينها يعنى المية المغلية نضيفها للاعشاب وليس العكس ونغطى المنقوع دا لمدة 15 دقيقة لازم يتغطى علشان الزيوت الطيارة منفقدهاش الخليط دا بامر الله بينضف المجارى النفسية تاما وبيمنع السدة التنفسية بتاعة الاى بى وبردة بيعمل وزن كويس

نقلا عن الدكتور عاطف عبد الدايم

 

من المعروف ان اى علف بة نسبة من السموم الفطرية كلنا يعلم ان النسبة دى ممكن الكبد يتعامل معاها لو حالتة جيدة لاكن بكثر التعرض للسموم حتى لو بحالة جيدة بيعمل فشل كبدى وكلوى ايضا بعد فترة هتقولى انا بنززل مضاد سموم كل فترة فعلا اجراء كويس وبيخفف العبئ عن الكبد والكلى
لاكن المشكلة الكبيرة فى ان على حسب تركيز السموم فى العلف بيقل معاها تتر التحصينات يعنى نفهم من كدا ان اى تحصينة مهما كانت عمرها ما تتم بحالة جيدة طالما فية نسبة من السموم ودا بيخلى الفيرس الحقلى لما بيجى مش بيلاقى الجسم يصد بالدرجة المطلوبة طيب والحل .
الحل ان تبعد شوية عن العلف الجاهز وجرب شغل تانى ازاى ركب علفك عندك واحنا كتبنا قبل كدا عن تاثير العرقسوس على السموم وتاثير الكركم على السموم وان الخميرة بترفع من قوة اى مضاد سموم وتحولة من مضاد عضوى الى بيولوجى طيب تعالى ناخد التجربة دى علشان نقول برنامج للسموم او معلومة كاملة الناس طول عمرها بتحصن نيوكاسل وتقيسس تتر بعدها ودايما تتر النيوكاسل بيكون اقل من المطلوب الى ان عرفو تاثير الزعتر على الجهاز التنفسى زى ما كتبنا فى بوست مفصل سابق فقولو نجرب العشب دا على اساس يهدى التنفسى شوية والغريب فى الموضوع ان وجد ان تتر النيوكاسل والجمبورو اعلى من كل مرة بسبب اضافة الزعتر دى احنا اعتقدنا فى الاول انة بيرفع التتر لاكن كان فية عتبر بياكل علف جديد وشركتة بتتحدى ان مفيش سموم ولوحظ ان العتبر دا تتر التحصينة فية اعلى من الباقى.
ولما اخد الزعتر اللتر لم يتاثر بالزيادة المرجوة بل كانت زيادة بسيطة عن كل مرة لاكن العنابر اللى بتاكل علف فية نسبة افلاتوكسين زادت فيها التتر الى تقريبا الضعف والموضوع دا اتكرر اكثر من مرة خرجنا من الموضوع دا بان الزعتر لة تاثير على الافلاتوكسين طبعا احنا جربناة باكثر من جرعة يعنى للتنفسى كنا بنحط 6 ك على الطن لاكن فى السموم بنحط 4 على الطن ومن التجربة دى والتجارب السابقة نقدر نطلع بتركيبة للسموم هتفرق معاك جدا وهى الزعتر بمعدل 4 كيلو على الطن العرقسوس بمعدل 3 ك على الطن الخميرة بمعدل 6 ك على الطن جرب دى على احد التركيبات اللى نزلناها على الجروب هنا وهتدعيلى بالنسبة للسموم الفطرية وحالة الكبد والكلى وتتر التحصينات .

نقلا عن الدكتور عاطف عبد الدايم

 

 

فية فكرة كنا بنطبقها ايام وباء الILT لما دخل مصر عام 2002 الى 2005 كان كل مشروع بنشرف علية بنخلى صاحب المشروع يعمل خط رشاشات زى بتاعة الزراعة كدا ونركب فيها الفونية زى بتاعة اوتومايزر الرش كدا وبيكون بين كل فونية والتانية 4 متر بطول العنبر متوصلة بخزان بلاستيك 100 لتر
وكان كل يوم باستثناء ايام التحصينات نرش فيركن اس عن طريق الرشاشات دى بدون اجهاد الطيور بالسير وسطهم وعند دخول الفيرس بالفعل كنا بنعمل كل 4ساعات رشة الاولى بتكون بيكربونات صوديوم التانية فيركن اس الثالثة مزيج من زيت النعناع مع زين الكافور بمعدل 1:1 يعنى طوال اليوم بيترش النوع الواحد مرتين ومن اول ما اقترحنا الموضوع دا قلت خساير الفيرس الى النصف واوقات كيرف النافق مش بياخد منحنى عالى زى كل مرة
طبعا مع علاج العدوى الثانوية ورافعات المناعة فى المية ومزيل البلغم بس فكرة البوست فى عملية الرش بصورة ضبابية تغطى العنبر كلة طبعا فى فترة الليل بنرفع الحرارة علشان الرش مش يعمل بردوة عالية تساعد على زيادة انتشار الفيرس وبنغير مكان الدفايات علشان تنشف الفرشة تحتها دى من التجارب القديمة اللى لقيتها عندى فى اجندة الذكريات .

نقلا عن الدكتور عاطف عبد الدايم

 

 

الناس بتوع التربية المنزلية اللى ناسينهم بقالنا فترة هنصالحهم بالبوست دا كتير من ربات البيوت عندهم فراخ بلدى وكتير بردة منهم الفراخ دى بتكبر فى العمر ولان المزارع مش بتحتفظ بالفرخة البياض غير سنة واحدة انتاجية فالتربية المنزلية الطير بيكون معاهم اكثر من سنتين وساعات اكثر طيب من المعروف ان المبيض بيعجز وانتاج البيض بيقل جدا عن ما تكون الفرخة شباب او فى اول سنة ليها طيب خد الوصفة دى وادعيلى اولا هتعمل تدريج على علف بياض يعنى لو بتاكل اكل بيتى اكل علف بياض بالتدريج وهتيجى على كل شكارتين علف ( 100 كيلو ) وهتخلط نص كيلو كمون مع 200 جرام ملح طعام الملح بيرفع جدا من كفاءة الكمون وبيعجل من النتيجة لو محطيتش ملح النتيجة هتتاخر شوية المهم هتلاقى انتاج البيض فى ازدياد حجم البيضة اعلى شوية صعم الصفار اجود واشهى بس اهم حاجة التدريج فى الانتقال من طريقة علفك الى العلف البياض يعنى مش مرة واحدة لان تغير العلف المفاجى على اى مبيض بيقلل جدا من الانتاج بل ممكن يوفقة لو العمر كبير .

 

 

 

فى احدى المزارع اللى بنشرف عليها كانت موبؤءة انفلونزا فى منطقة جدة والعميل ماجرها وعارف انها موبؤءة لان مفيش مزراع تانية متاحة للايجار ولما سئلنا العمال اللى شغالين فيها كلهم اجمعو على قول واحد انك من اليوم ال19 الى اليوم ال22 من العمر لازم تجهز اى وسيله علشان نشيل النافق بتاع الانفلونزا انا حاولت اخلية يسيبها لان العمال بيقولو لا يمكن دورة تعدى من غير الوباء دا لاكن صاحب المزرعة مكنش عارف يعنى اية وباء ومعتقد انة مرض عادى ولة علاج المهم قبلت الاشراف على استحياء وبعد محايلات وكنت بتعامل مع الطير من اول يوم على اساس انة ابعدة عن اى حاجة تثبط المناعة فاستقبلت على بروبيوتيك (( سيلكو بى اتش ) لمدة 5 ايام ولمدة يومين بالموتيل وكررت موضوع البروبيوتيك دا 3 مرات انثاء الدورة وحبيت اعمل حاجة مختلفة فجبت اعشاب مختصة فى الفيروسات التنفسية كان الينسون الصينى والزنجبيل والزعتر وحطيتهم 5 ك لكل منهم على الف لتر قبل موعد الوباء ب5 ايام يعنى على عمر 15 يوم الى عمر 20 يوم /
وبطلتة يومين علشان احصن كولون واشتغلت على عمر 22 الى 28 يوم فى الليل الخلطة دى وفى النهار خميرة 5 جم على اللتر مع ثوم 4 جم على اللتر وعدى اليوم ال19 وبعدة العشرين وخلصت الدورة ومجاش الانفلونزا اللى متعودين عليها مسيت اقول انى من يوم 16 الى اليوم 24 كنت برش فيركن كل يوم اما مرة او مرتين الرش على خلايا التبريد ورش على حواف العلف ورش فى اعلى نقطة فى جو العنبر علشان يتنزل منتشر كررت التجربة دى دورتين ورا بعض بنفس الالية من غير اى تغيير وفى جابت نفس النتيجة هتقولى الشغل بالبروبيوتيك هو السبب اقولك جايز هتقولى استعمالك لاعشاب مختصة فى الفيروسات التنفسية وطاردة للفيروسات فى الدم اقولك احتمال هاقولى انك كنت مقوى جدار الامعاء ورافع المناعة المعوية بالخميرة والثوم اقولك يمكن لاكن دى التجربة زى ما حصلت معايا حكيتها ملاحظات اخرى على نفس الدورات المعوى كان دايما نظيف الظشمة ظهرت فى اخر العمر بس كانت خفيفة جدا لما كنا بنشرح النافق الطبيعى كنا بنلاحظ جدار امعاء فوق الممتاز بصراحة لم لاحظة بالشكل دا قبل كدا وبردة الجزء الاعلى من الجهاز التنفسى كان نادرا لما يكون فية التهاب فى مخاط اللهم اجعل عملنا هذا خالص لوجهك الكريم .

نقلا عن الدكتور عاطف عبد الدايم

 

هقول رائى الشخصى وقابل للناقش فية تتفق او تختلف معايا فى النهاية مجرد راى الوبائية منتشرة فى بلادنا كلها بدون استثناء سواء نيوكاسل اة اى بى او انفلونزا بنوعيها وكنا من فترة ليست ببعيدة كان فية خلطات دوائية بتقلل من النافق وبتكسر حدة الفيرس بسرعة لاكن الخلطات دى مع مرور الوقت فقدت فعاليتها السسب لا اعلمة حتى التحصينات فقدت شرعيتها بسبب العترات الجديدة انا شايف ان الحل هو الرجوع للطبيعة يعنى الامراض اللى مصدرها الارض او مية الارض او هواء الارض فعلاجها نبات الارض او اعشاب الارض هقولكم موقف يدعم كلامى ايام انتشار انفلونزا الطيور فى 2004
كل مناطق الصين جالها المرض ماعدا بلدة واحدة وبعد البحث وجدو ان فية نبات بتمتاز المنطقة دى بزراعتة اللى هو الينسون النجمى او ما يسمى الينسون الصينى ومن هنا شركة روش السويسرية اخذت فكرة عقار التامفلو اخدو المادة الفعالة وحطوها فى عقارهم واصبح لهم السبق والريادة فى الموضوع دا بل حجزو كل المحاصيل اللى بتتزرع فى البلد دى ومواقف اخرى شبيهة ان وباء يضرب بلاد وتيجى عند منطقة معينة ومش يضربها
موقف ثالث بتاع انتشار الكوليرا او الطاعون مش متذكر ايام الرسول ولاحظو ان بيت واحد مش بيجى فية الوباء ولاحظو انهم معلقين بصل بشكل معين
والمواقف كتير من النوع دا يعنى الخلاصة ان علاج اللى احنا فية مصدرة الارض وصدقونى حتى لو مشينا علميا وعزلنا العترات الجديدة وعملنا منها تحصين بردة بعد فترة هيظهر عترات غيرها احنا فى دايرة مغلقة يعنى ابحث فى كل ما تنتجة الارض اللهم اجعل عملنا هذا خالص لوجهك الكريم .

نقلا عن الدكتور عاطف عبد الدايم

 

فية طريقة طبيعية تسرع من الشفاء او تحسن شغل الادوية التنفسية يعنى كتير من المربين بيحقن علشان الاصوات التنفسية ولازم يحقن تانى
او يستنى 24 ساعة علشان يشوف نتيجة الحقنة لاكن فية طريقة تعجل من شغل الحقنة او تحسن الجهاز التنفسى مع الادوية ولو فية تجبنات او فيبرين فى المجارى التنفسية بيعوق الدوا هو هيقلل منة الطريقة صعبة شوية لاكن نقولها من باب العلم بالشئ تقطير نقطة زيت كافور فى الانف وانت بتحقن بس زيت الكافور النقى.
اخر الملاحظات الحقلية المدعمة بالشغل المعملى الملحوظة الاولى بيكربونات الصوديوم او ما يسمى الكربوناتو اثناء او اخر الاصابة بالكولستريديا
بيطيل فترة افراز سموم الكولستريديا حتى لو اتعالج المرض نفسة بيظل توكسينات الكولستريديا شغالة فترة اطول ودا هتلاحظة
المفروض بعض الشفاء من المرض بننتظر من4 الى 5 ايام علشان خلايا الامعاء المهتكة وخملاهتها تلتئم لاكن مع افرازا توكسينات او سموم الكلوستريا بتطول فترة البناء دا وبيطول فترة الاسهال النبى بس بدون فقاقيع هوائية يعنى شيل الكربوناتو لو عندك كلوستريديا .
الملحوظة التانية
اضافة 6 كيلو ثوم على العلف قبل وبعد تحصينات الامراض الفيروسية وخاصة النيوكاسل والانفلونزا بيزيد من الاجسام المناعية ويزيد من تتر التحصينة
مقدار الزيادة مش ثابت لاكن كل التجارب الحقلية بتاكد ان مفيش مرة فراخ اكلت علف علية ثوم الا وكانت تتر التحصينة اعلى من الفراخ اللى ملكتش
فانصحك تجرب بنفسك قبل التحصينة ب 4 الى 5 ايام وبعدها ب 2 يوم ضيفة على العلف وقيس تتر عن اقرب معمل ليك وقارن وشوف النتيجة
هتلاقيك بتعمل الاجراء دا كل مرة وسنوفيكم بكل جديد حقلى مجرب فى عالم علاج الدواجن .
يا جماعة معايير الشغل بالاعشاب او اية اللى يخليك تشتغل اعشاب وتلاقى نتيجة زى ما جربناها

اولا اضافة العشب على العلف علشان تاثير العشب يكون اطول ما يمكن شغل المية نتيجتة لا تتعدى من 50 الى 60% من نفس الخلطة على العلف وانا جربتها كتير

ثانيا الاعشاب مش مغشوشة او مضاف عليها عشب اخر ودى محتاجة اما تشترى من مصدر ثقة او ان يكون عندك خبرة فى الاعشاب يعنى لما تروح تشترى ميليسيا افركها لو مش لقيت فى ايدك ريحة ليمون هتكون مغشوشة لو الكركم لم يترك اثر اصفر فى ايدك وصعب يتشال هيكون مغشوش و هكذا وعلى فكرة غش الاعشاب بيعمل سموم بتبان فى التشريح نفس اعراض التسمم الدوائى وانا انا شفتة فى اكثر من مزرعة.

نقلا عن الدكتور عاطف عبد الدايم

ثالثا طول مدة تعرض الطير للعشب ودى قدامك طريقتين لو خايف من الفيروسات خد لك اى خلطة فيروسية واشتغل عليها من بعد اليوم الخامس من العمر يعنى الخملات واللمفات المعوية اكتمل تكوينها الى قبل البيع ب3 ايام لو مفيش حاجة محدةة ممكن تقسم شغلك علفة ليل وعلفة نهار واحدة شاملة تنفسى مع معوى مع وزن دى فى النهار وفى الليل خد تركيبة السموم يعنى حط لنفسك استراتيجية وشوف انت عاوز اية من الاعشاب
والجروب علية 42 خلطة عشبية شاملة كل جوانب علاج الدواجن رابعا اول مرة تجرب الاعشاب ؟ تمام خد خلطة اشتغل عليها وقسم الفراخ بتاعتك قسمين نص للشغل الطبيعى والنص التانى للخلطة العشبية وفارن بينهم فى النافق اليومى الوزن سرعة الاصابة التوفير فى الادوية وانت اللى تحكم بنفسك تكمل فى اى اتجاة .

خامسا متسمعش كلام حد غير التجربة الفعلية يعنى متصدقش على فراخك فقط

سادسا الخلطات اللى كتبناها مجربة لو عاوز تضيف حاجة عليها فيكون تجربة على 100 طير على جنب قبل الاستعمال لان فية اعشاب سامة زى الحنضل واعشاب بتعمل اسهال زى السناميكى واعشاب بتقلل نازعة دهون زى الزنجبيل
علشان كدا الحاجة اللى متجربتش خلى بالك فى اول استعمال لها

سابعا متسمعش كلام حد مجربش اعشاب او مدرسش اعشاب او بيبيع حاجة تانية عكس الاعشاب لان نصيحتة مش هتكون لوجة الله

ثامنا طريقة خلط العشب لازم يكون ناعم ومتوزع بتجانس فى العلف علشان مش نلاقى فراخ اكلت باعشاب واخرى لا واخيرا
اشتغل اعشاب وانت فى نيتك تطلع طير نضيف خالى من الادوية حسبة لله
وانك تاكل الناس حاجة نضيفة ( لو استحضرت النية صدقنى هتلاقى العجب العجاب فى النتايج )
هنبدا على بركة الله بسلسلة تجارب عشبية فى البياض زى ما كتبنا 42 بوست في علاج الدواجن بالاعشاب فى التسمين فلو فية قبول هنكمل السلسلة بامر المولى من اساسيات عملية انتاج البيض هى عملية اثارة هرمونية بتيجى من المخ وبالتحديد من منطقة الهيبوثلاموس لافراز هرمون البروجسترون او افراز المباشر لهرمونى ال LH و FSH الهرمونات دى وهرمونات اخرى هى اللى بتحفز انتاج البيض اما بصورة مباشرة او بصورة غير مباشرة طبعا الامر بتاع الهرمونات معقد شوية وصعب اننا نحصية هرمونيا ( انا دارس الهرمونات والغدد دى فى 6 محاضرات فصعب نلمها فى سطرين) كمان مش يهمنا حقليا الكلام دا
بس انا بقولة لية علشان فى الظروف الطبيعية للمبيض ولعملية التبويض بيكون حركة الهرمونات دى طبيعية اما مع التدخل .

نقلا عن الدكتور عاطف عبد الدايم

 

 

 

 

4 تعليقات

  1. عاطف عبد الدايم

    تجميعة البوستات دى بتاعتى
    لية شايل توقيعى؟

  2. عاطف عبد الدايم

    انت كاتب
    علاج الدواجن بالاعشاب معلومات مجمعة عن تجارب المربين
    فين المربين دول
    لو سمحت اما تنقل بوستاتى تنقلها كما هى حرفيا بالتوقيع
    او عدم النقل

    • تم التعديل تحت كل فقرة اسم حضرتك ودي ققل حاجة ققدمهالك وانا تحت امرك في اي حاجة

[php] [/php]