الرئيسية / الإنتاج الزراعي والحيواني / الاسهال في الدواجن مرجع لكل مربى

الاسهال في الدواجن مرجع لكل مربى

نعمل تجميعة نعتبرها مرجع لكل مربى  عن الاسهال في الدواجن فى الاول هنستعرض القناة الهضمية علشان نعرف الاسهال بيجى منين  اقرا المقال كويس وادعى لصاحب الموضوع بظهر الغيب

تابع بورصة الدواجن بتحديث مستمر

هنتكلم عن حاجة كتير من الناس عارفينها لاكن هنتكلم عنها بتخصصية اكثر شوية اللى هى الامعاء دا من اهم الاعضاء فى الجسم ومن غيرة مش هيحصل تسمين لانة الممر بتاع الكتلة الغذائية
طيب الامعاء دى اية اللى ممكن يرفع كفائتها واية ممكن يخفض منة
الاول نشوف هى متكونة من اية

 

لو قطعنا جزء من الامعاء هنلاقيها عبارة عن حاجة اسمها خملات او villi
منتشرة بطول الامعاء والخملات دى هى اللى بتخلى مساحة الامعاء كبيرة علشان يحصل اكبر قدر من الهضم والامتصاص وبالتالى وزن سريع
وعلشان نفهم تركيب الامعاء هنقول انها بالظبط عاملة زى الفوطة او المنشفة
يعنى الوبر بتاع الفوطة هو الخملات وبين الوبرة والتانية حاجة اسمها جريبات او crypts
وكل وبرة او خملة مكونة من خلايا معوية
طيب وفية حاجة هامة ايضا اسمها خلايا جوبلت هى اللى بتفرز الانزيمات الهاضمة والمخاط علشان الهضم وتليين الكتلة الغذائية
طيب يعنى لو كل المكونات دى سليمة بالتالى هيعمل هضم جيد وسريع وصحة كويسة

 

طيب لما بيحصل تهتك او تمزق فى احد او كل الاعضاء اكيد بيعمل نقص فى الهضم وبالتالى وزن اقل ودا اللى بنسية الاسهال يعنى خروج الزرق بصورة سائلة بنعتبرة خلل فى الامعاء
ومن كرم ربنا على الطير ان المكان دا من الامعاء اكثر عضو خلاياها بتلتئم بسرعة بعد ما تتهتك يعنى اعلى حاجة 48 ساعة والخلايا ترجع لاصلها طبعا فى حالة ان المسبب اتشال (فيرس – بكتريا – سموم)
طيب كل الكلام دا هيفيد المربى فى اية
هنقول ان كل ما الخلايا دى طولت كل ما زاد الهضم والامتصاص وبالتالى زاد الوزن

 

طيب ودى هتزيد ازاى
هنا بقى شغل البروبيوتك بس لاحظو ان البروبيوتك لوحدة مش بيطول الخملات الا لما تلاقى حاجة تغذيها لان شغل البروبيوتك وقتى ومحدود علشان كدا حطو مع البروبيوتك البريبيوتك
وعملو حاجة اسمها سينبيوتك
واى مركب مكون من البرو و البرى تعرف على طول انة بيعمل وزن جيد من خلال الالية اللى شرحناها دى
بردة كل الناس اللى بتستغل بالطريقة دى دايما مفيش اسهلات ولا امراض معوية (كولاى – سالمونييلا )
طبعا الشغل دا عكس الشغل بتاع المضادات الحيوية لان المضدات بتموت الفلورا المعوية اما شغل السينوبيوتك بينشطلها وبيخليها تحتل مكان المسببات المرضية زى الكولاى والسالمونيللا فمش هتلاقى مكان وبالتالى مناعة الجسم تتغلب عليها
ودا الشغل الحديث تقريبا فى العالم كلة
مع تحياتى وشكرا
مهندس عاطف عبد الدايم
—————————————
هنتكلم على الاسهال فى الدواجن
بشكل مبسط بة جزء علمى وجزء حقلى
علشان الناس تعتقد ان لون الاسهال ممكن نشخص مرض من خلالة
واحنا كتبنا بوستات كتير على الموضوع دا
فتعالى كدا مع بعض نفهم كل حاجة عن الاسهال
مخرجات الدواجن عبارة عن جزء بنى غامق متغطى بغطاء ابيض
الابيض دا اليويك اسيد
والبنى الغامق دا نتيجة شوية حاجات مع بعض علشان الناس تركز معانا فى الحتة دى
= البنى عبارة عن نواتج هضم العلف
= بقايا خلايا الامعاء اللى ماتت وهتتجدد
= نواتخ هضم وتمثيل وتخمر البكتيريا النافعة اللى فى الامعاء او حتى الضارة
=جزء من العلف اللى ملحقش يتهضم
طيب ال4 حاجات دى تدل على
ممكن يكون فية لون احمر فى الزرق من غير ما يكون كوكسيديا او بنى ومش كولستريديا
لان فية عندك خلايا بتتجدد وبواقيها
طيب تلاقى جزء من العلف غير مهضوم والناس تشخص كولستريديا
ويطلع فى الاخر ان حركة العلف سريعة فى القناة الهضمية فبيقل معاها الهضم ففية جزء بيخرج غير مهضوم
طيب ناس كتير تقول ان الزرق اللى له ريحة كولستريديا
واحنا قلنا ان عادى جدا نتيجة نتواتج تخمر وهضم الميكروبات النافعة يعنى ممكن يكون زيادة شوية فيعمل كدا
انا معاك ان الكولستريديا تعمل كدا لاكن بردة مسببات طبيعية تسبب الريحة دى
طيب نقول بردة بخصوص ليونة او سيولة الزرق
ان الزرق الطبيعى المفروض ان محتواة من المية او الرطوبة من 40 الى 55%
دا معناة ان سهل جدا تلاقى سيولة شوية فى الزرق
وان الاعورين بيفرغو محتوياتهم بصورة طبيعية فى اليوم من 3 الى 4 مرات
كل اللى فات دا يعرفك حاجة اكيدة وحيدة فريدة
ان
لية الزرق فى اى قطيع مش شكل واحد او حجم واحد او لون واحد الاختلافات بتيجى من كدا
احنا كدا اتكلمنا على الزرق وتركيبة
تعالى نشوف اية الحاجات اللى تعمل اسهالات
طبعا الاسباب كتيرة جدا جدا فلو فصلنا كل حاجة لوحدها هكتب كتاب كامل
لاكن هنقول عناوين
اسباب الاسهال
اولا اسباب غذائية
زى زيادة الاملاح فى المية فالطير يشرب زيادة فيحصل اسهال
تغير العلف بشكل فاجئ من نباتى لحيوانى والعكس
اعتماد بعض العلائق على منتجات صعبة الهضم زى الشعير
محتوى العليقة من الدهون او الاحماص الدهنية المشبعة بيعمل الاسهال
سموم العلف
زيادة عسر الماء
بعض الفيتامينات المذابة فى الدهون لو طريقة عملها مش جيدة تسبب دهون
واسباب كتير تانية غذائية
فية اسباب رعاية
زى الحرارة العالية وما يتبعها من شرب مية كتير
فى نقص التهوية واللى بيقلل الاوكسجين
اما عن الاسباب المرضية فدى كتر جدا
كولاى – سالمونيللا – كوكسيديا – كولستريا – فيروسات بكل انواعها
طيب اكبر مخاطر الاسهال اية
ان بيرفع الامونيا
ازاى؟
ان الرطوبة العالية بتعمل قلوية فى الفرشة بسبب التخمر فى مكروبات الفرشة
ودا بيحول حمض البوليك الى امونيا
يعنى الاسهال سواء مرضى او طبيعى فهو غير مستحب
لاكن لو حالة فردية فمش هيكون لة الاضرار دى
يعنى خلاصة القول حدد نوع سبب الاسهال وعالج بناء على كدا
ومش يكون راسخ فى ذهنك لون معين لمرض معين وتعالج وترجع تقول لية العلاج مش جايب نتيجة فتخسر فلوس العلاج وترهق الطير ادوية
اتمنى ان يكون البوست افاد البعض
اللهم اجعل عملنا هذا خالص لوجهم الكريم
مع تحياتى وشكرا
مهندس عاطف عبد الدايم
———————————————-
احنا اتكلمنا قبل كدا على بعض الامور المعتادة بين المربين وانها ممكن تطلع غلط زى لون الاسهال مثلا وخصصنا لة بوستات كتير وتقريبا الكل قرئها
طيب تعالى هنا نقول معلومة كويسة هتفيدنا فى فهم حاجة بنشوفها كتير وبنشخصها غلط
هى انفتاخ الاعورين اللى 90% من المشرفين بيقولو علية كولستريديا
طيب تعالى نبحر شوية فى العضو دا ونعرف لية بيحصل فية انتفاخ هوائى
طبيعى وليس مرضى
بيقولك من عمر 3 ايام فى حياة الكتكوت ولما فحصو الاعورين وجدة بكتيريا كتير نافعة مقابة للعدد اللى موجود فى الامعاء سواء لاكتوباسيليس او انتيروباكتيراسى او استربتوكوكاى كلهم متعايشين وكلهم بيعتبرو بكتيريا مفيدة تساعد فى الهضم والامتصاص ومقاومة البكتيريا الضارة وافراز بعض الانزيمات الهاضمة
لاكن مع وجود احماض دهنية طيارة فى العلف وواستيات وبيوترات فالبكتيريا النافعة دى بتقل فى الاعورين وبتزيد فى الامعاء
لاكن بداية من عمر 12 يوم بتزيد جدا جدا البكتيريا الاهوائية فى الاعورين بمعدل 10 الى 15 ضعف عن الامعاء
وفى العمر دا وجد ان البكتيريا الموجودة فى الاعورين عبارة عن
65% عائلة الكولستريدياسى ودى منها مرضى ومنها طبيعى او مفيد للجسم
و
14%فيوزاريوباكتيريم
و
8% لاكتوباسيلليس
5% باسيلس
انا عارف ان الكلام كلة مش مهم
لاكن اهم نقطة ومن غير كلام علمى كتير
ان بعد اليوم العاشر من العمر لزيادة وجود عائلة الكولستريديا بجميع انواعها بصفة طبيعية اللى هم (Clostridium leptum و Clostridium coccoides )
ونتيجة معيشتهم فى الاعورين بينتج غازات فبتعلم انتفاخ فى الاعورين
من غير ما يكون فية مشكلة مرضية
ودا يوضح ان الاستهلاك طبيعى ومفيش نافق ومفيش اعراض مرضية ومع ذالك تفتح تلاقى انتفاخ وريحة فى الاعورين وتعالج كولسترديا وتخسر فلوسك على الفاضى
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم
——————————–
للمرة التانية
عمر ما فية مرض هيتشخص من لون الاسهال
لان ممكن لونة معين يعملة اكثر من مرض
لاكننا هنا هنقول مصادر الاسهالات
الابيض مصدرة الكلى يعنى فية خلل فيها
الاخضر مصدر المرارة ودا بردة بيعملة حاجات كتير
البنى مصدرة الامعاء
الاحمر مصدرة الاعورين مع الجزء السفلى من الامعاء
طيب الاسهال بتاع الامعاء دا امتى يكون بنى وامتى يكون احمر وامتى يكون بنى فاتح
هنقسم الامعاء الى اربع اقسام من اول الاثنى عشر الى المستقيم هنقسمة الى اربع اجزاء
اذا اصاب الجزء الاول هينتج عنة اسهال بنى فاتح مايل الى البرتقالى
واذا اصاب الجزء او الربع التانى هيظهر اسهال بنى فاتح
والجزء الثالث يظهر بنى عامق
والجزء الاخير يظهر دم
واذا ظهر بنى برائحة كريهة يعنى الاسهال دا اختلط بخلايا متهتكة ميتة من جدار الامعاء
مع تحياتى وشكرا
اخوكم مهندس عاطف عبد الدايم
————————————-
هنتكلم عن حاجة موجودة فى كل دورة وملازمة لاى كتكوت
الا وهى الاسهال البنى
بس مش من وجهة نظر الكتب من وجهة نظر المزرعة
الاسهال البنى دا عبارة عن مسبب مرضى (مهما كان الاسم)
عمل تهتكات او نخورة فى جدار الامعاء وانتج عن كدا دم خفيف على حسب شدة الاصابة واختلط الدم دا بالزرق العادى فكون الاسهال اللى بنشوفة دا
ممكن يكون بنى غامق
ودا احدى احتمالين اما ان الدم كتير يعنى المسبب المرضى دا قوى
او ان الاصابة فى ادنى جزء من الامعاء
وممكن يكون بنى فاتح ودا العكس
اما الدم قليل يعنى الاصابة خفيفة
او ان الميكروب شغال على نقطة عالية من القناة الهضمية
المسبباب كتير
كوكسديا
كلستريديا
اى كولاى
استريتكوكاس
سالمونييلا معوية
او اى انتيروباكترياسى تانية غيرهم
احنا بنقول الكلام دا لية
علشان نلغى فكرة ان اى اسهال بنى معانة كوكسيديا
والمربى ينزل بالسلفات لغاية لما الكلى تتهرى منة وبردة الاسهال البنى مرحش
ودا اكيد حصل من ناس كتير
وبردة بعضهم ينزل بالاموكسى او الريفاميسين على اعتقاد انة كلستريديا وبردة مش بيروح دا طبعا من ما ايقن انها مش كوكسيديا
ووحد تانى بيحب يكلف ومش بيحب يكون شكل الاسهال دا عندة فيخلط
السلفا مع الاموكسى مع الجنتا مع النيومايسين
وفى الحاة دى بس هيروح الاسهال
بس فية بس احتمال بسيط اخير
يكون تلبكات معوية عادية ودى طبعا مش هتروح بالخلطة اللى فاتت دى ومش مهم تروح اصلا لانها غير ماثرة لا على التحويل ولا على النافق
واوقات بيكون رد فعل تحصين معوى زى ما بيحصل مع تحصينة الافنيو
وممكن بردة يكون مصحوب للريو فايروس النوع بتاع عدم الامتصاص
وفى الحالة دى اعزل الشوية دول وريح دماغك منهم
دى فكرة سريعة وبسيطة عن الاسهال البنى من وجهة نظر المزرعة
مع تحياتى وشكرا
اخوكم
مهندس عاطف عبد الدايم
———————————————-
الاسهال الاخضر
سببها الاساسى او مصدرة هو المرارة او اى التهاب كبدى واصل للمرارة
طيب اية اللى ممكن يعملة
بيعملة
* نيوكاسل
* اشيريشيا
* كوليرا
* اسبيروكيتوزيز
* تسمم بفوسفيد زنك
* نفتالين
* جرعة غير متزنة من اى عشب فية زيت الطيار نفثالين
* التجويع
* افلاتوكسين
* احد صور السالمونيللا
يعنى من خلال الكلام اللى فات دا
صعب التشخيص من خلال عرض الاسهال الاخضر فقط
وفية حاجات تانية تعمل اخضر لاكن حبينا نبين ان التشخيص من العرض احتمال صحتة ضعيفة
وفى بوست اخر بامر الله هنحاول نميز بين كل مرض من اللى فوق ونشخصة ازاى لما نلاقى اخضر
يعنى اخضر مع اية يعمل مرض اية
مع تحياتى وشكرا
اخوكم مهندس عاطف عبد الدايم
—————————————–
اتمنى بعد السرد الدقيق والحقلى والعلمى ايضا عن الاسهال ومصدرة وطريقة افرازة
نكون عرفنا ان مفيش مرض بيشخص من اسهال
لازم باقى العوامل
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم

عن memy noaman

اترك تعليقاً

لن يتم نشر عنوان بريدك الإلكتروني.